Bashkimi Evropian ka zgjatur rregullat e emergjencës për të strehuar njerëzit që ikin nga lufta në Ukrainë deri të paktën më 4 mars 2026.
“Ditë pas dite, Rusia terrorizon popullin ukrainas me bombardimet e saj”, tha në një deklaratë sekretarja e shtetit belg për Azilin dhe Migracionin, Nicole de Moor, e cila kryesoi bisedimet për zgjerimin e rregullave.
“Ata që ikën nga agresioni i Rusisë mund të vazhdojnë të llogarisin në solidaritetin tonë", theksoi ajo.
Ukrainasve që ikën në Bashkimin Evropian pas pushtimit të plotë të Rusisë në vendin e tyre në vitin 2022 u është dhënë mbrojtje e menjëhershme pasi vendet anëtare të BE-së vendosën një regjim të përkohshëm të krijuar për rastet e dyndjeve masive të njerëzve.
Skema ekzistuese do të përfundonte në mars 2025.
Propozimi është krijuar për të shmangur procedurat e gjata kombëtare të azilit të nevojshme për të akomoduar një numër të madh të njerëzve të zhvendosur. Zgjatja e rregullave të përkohshme është e mundur deri në një vit.
Për më tepër, personat nën mbrojtje të përkohshme kanë të drejtë, ndër të tjera, për përfitime sociale, strehim, akses në arsim dhe leje pune.
/ rtsh.al /