Kryetari i Demokratëve Euroatlantikë, Lulzim Basha, deklaroi të premten se aleanca e trekëndëshit kundër drejtësisë vazhdon në koordinim betejën e saj.
Nëpërmjet një postimi në rrjetet sociale, shoqëruar edhe me një video, Basha shkruan se: “’Dhëmb për dhëmb’ me drejtësinë, herë njëri e herë tjetri, por gjithçka në koordinim për t’i bërë presion dhe për ta shantazhuar”.
“Njëri çon militantët, tjetri administratën. Njëri e sulmon, tjetri bën sikur e mbron. Refuzimi i Policisë për të mbrojtur institucionet e Drejtësisë është një akt i rëndë, i kryer me vetëdije dhe qëllim, i cili nuk mund të kalohet pa përgjegjësi ligjore dhe politike.”, shkruan Basha.
Sipas tij, vetë institucionet e Drejtësisë kanë të gjithë autoritetin për të nisur ndjekjen penale ndaj shkelësve të ligjit, duke filluar nga protestuesit e deri te urdhëruesit, për të vijuar me drejtuesit e Policisë, ministrin dhe deri te kryeministri.
"Qytetarët, jam i bindur, do t’i ndëshkojnë me votën e tyre më 11 maj dhe do të hapin një faqe të re, ku të gjitha institucionet luftojnë korrupsionin dhe nuk e mbrojnë atë." mbyll postimin Basha.
/rtsh.al/
