Emra të njohur të botës së krimit kanë rënë në prangat e Policisë këtë të premte, të akuzuar si bashkëpunëtor në atentatin ndaj ish-prokurorit Arjan Ndoj, të ndodhur në nëntor të vitit 2019, nga ku mbeti i vrarë shoferi Andi Maloku. Policia bën me dije se në pranga kanë rënë 5 persona dhe janë shpallur në kërkim 4 të tjerë, pas një operacioni të zhvilluar në Tiranë, Durrës dhe Fushë Krujë, ku u kryen kontrolle në 11 banesa.
Bëhet me dije se mes të arrestuarve janë Genti Ndërjaku alias Kili Ndërjaku, Marsel Deçka, Endrit Sinani, Julian Pjetri dhe Bashkim Haxhija, ndërsa mes personave të shpallur në kërkim janë Julian Meçaj, Plaurent Dervishaj dhe Redjan Rraja.
Ata akuzohen se kanë siguruar kushtet dhe mjetet materiale për të kryer atentatin ndaj ish-prokurorit, ndërsa akuzat që rëndojnë ndaj tyre janë “vrasja e funksionarëve publikë”, mbetur në tentativë, “vrasja në rrethana të tjera cilësuese”, “mbajtja pa leje dhe prodhimi i armëve, armëve shpërthyese dhe i municionit” dhe “vjedhja”, më shumë se një herë, të kryera në bashkëpunim, në formën e grupit të strukturuar kriminal.
Ndërkohë, Akil Nerjaku, i njohur si “Kili” i Shijakut, i shpëtoi një atentat me snajper në shtator të 2022-shit. Ai rezulton me precedent të mëparshëm penale, pasi është arrestuar më herët për armëmbajtje pa leje, ndërsa dyshohet se u arrestua gjatë kontrollit të ushtruar nga hetuesit e BKH-së në banesën e Ramazan Rrajës, nipit të deputetit socialist Rrahman Rraja. Po ashtu, edhe Bashkim Haxhia është emër i njohur, ndërsa i shpëtoi një atentati në vitin 2019 në Durrës, teksa po lëvizte me automjet sëbashku me Plaurent Dervishajn dhe Julian Meçajn.
Gjatë kontrolleve u sekuestruan 1 armë gjahu, 1 jelek antiplumb, 2 jelekë shpëtimi, dylbi me rreze të largët, 5 automjete, 4 milionë lekë, 6 aparate celulare, 50 kontrata shit-blerjeje pronash, dokumente, 11 ora dore të markave të shtrenjta dhe sende të tjera të ndryshme.
Si ndodhi atentati ndaj Arjan Ndojës
Ngjarja u regjistrua më 1 nëntor të vitit 2019 në autostradën Tiranë-Durrës, në afërsi të mbikalimit të Shkozetit. Ndoja po lëvizte në automjet me Landi Muharremin, person me precedent penal, i njohur si i "forti i Sukthit", dhe shoferin Andi Maloku. Nga të shtënat mbetën të plagosur Ndoja, Muharremi dhe Maloku, por fatkeqësisht ky i fundit nuk mundi t’i mbijetonte plagëve të marra dhe ndërroi jetë në spital. Nën akuzë për atentatin janë Redjan Rraja dhe Ariol Halili.
Njoftimi i plotë i Policisë:
/rtsh.al/
