Ka nisur në Asamblenë Parlamentare të Këshillit të Europës diskutimi lidhur me raportin për anëtarësimin ose jo të Kosovës. Deputetja greke, Dora Bakoyannis e cila ka përpiluar raportin, u shpreh me punën për përgatitjen e raportit është konfirmuar se Kosova është demokraci funksionale, duke i bërë thirrje Këshillit të Ministrave që ta ftojnë të bëhet anëtare e Këshillit të Europës. Megjithatë ajo theksoi se janë vërejtur edhe disa mangësi.
“Juristët kanë konfirmuar qëndrimin se Kosova i përmbush kërkesat bazike për anëtarësim në Këshillin e Evropës”, u shpreh Bakoyannis, duke shtuar se raporti nuk prek çështjen e njohjes apo mosnjohjes së Kosovës dhe se kjo duhet të mbetet kompetencë e shteteve.
Lidhur me Asociacionit e komunave me shumicë Bakoyannis u shpreh se kjo nuk është çështje në duart e Këshillit të Evropës.
“Shpresoj që sot Asambleja Parlamentare do ta nënvizojë nevojën për t’i sjellë nën ombrellën demokratike të KiE, 2 milionë europianë të tjerë, për t’i mbrojtur ata nga shkeljet dhe për të mos lejuar rrezikimin e jetës së tyre”, përfundoi raportuesja.
Që Kosova të anëtarësohet në Këshillin e Europës duhet të marrë të paktën 2/3 e votave të vendeve anëtare
Ky votim i sotëm, është kundërshtuar gjatë javëve të fundit nga Serbia, ku Presidenti serb Aleksandër Vuçiq (Aleksandar Vucic) urdhëroi ngritjen e një grupi të posaçëm pune për të penguar anëtarësimin e Kosovës në KiE.
Këshilli i Evropës është organizatë lidere në Evropë në fushën e të drejtave të njeriut. Pjesë e tij janë 46 shtete, përfshirë 27 vende anëtare të Bashkimit Evropian dhe të gjitha vendet e rajonit.
Kosova paraqiti kërkesën e saj për anëtarësim në Këshillin e Evropës në maj të vitit 2022 pak kohë pas përjashtimit të Rusisë nga kjo organizatë, pas agresionit në Ukrainë.
/rtsh.al/