Autoritetet franceze arrestuan të premten një person pas një alarmi të dhënë nga konsullata e Iranit në Paris se në ambientet e saj kishte hyrë dikush me lëndë eksplozive.
Policia e kryeqytetit francez deklaroi se i dyshuari doli nga konsullata dhe po merret në pyetje.
Ndërkohë prokurorët e çështjes njoftuan se pas alarmit të konsullatës iraniane nuk u gjet asnjë lloj eksplozivi.
Mediat franceze raportuan se i dyshuari kishte kërcënuar se do të hidhte veten në erë. Një burim sigurie i tha më herët Agjencisë Franceze të Lajmeve se misioni diplomatik i Iranit thirri forcat e rendit pasi një dëshmitar vuri re një burrë që kishte hyrë në ndërtesë duke mbajtur një granatë ose një brez me eksploziv. Njësia elitare e policisë u mobilizua kur u kërkua ndërhyrja e menjëhershme dhe pasi rrethoi zonën u bëri thirrje qytetarëve që të shmangnin zonën. Edhe kompania e transportit në kryeqytetin francez njoftoi se pezulloi qarkullimin e dy linjave metroje që kalonin pranë konsullatës së Iranit në Paris.
Gazetare Vjollca Xharri
/ rtsh.al /