Presidenti amerikan Donald Trump miratoi kërkesën e Elon Musk që punonjësit federalë të përmbledhin arritjet e tyre javore ose të përballen me shkarkimin.
Ai tha se kishte “shumë gjenialitet” pas shtytjes së Elon Musk për t’i kërkuar çdo punonjësi federal të paraqesë pesë pika për atë që bënë javën e kaluar – dhe vuri në dukje kërcënimin e shkarkimit të njerëzve që nuk respektojnë kërkesën.
Kjo erdhi vetëm disa minuta përpara se një email i qeverisë t’u thoshte krerëve të agjencive se kërkesa për email që shkoi për 2 milionë punonjës federalë, ishte vullnetare.
Lëvizja e Musk shkaktoi disa nga reagimet e para të brendshme kundër kreut të DOGE brenda administratës Trump.
Drejtori i ri i FBI-së, Kash Patel dhe krerët e tjerë të agjencive u thanë punonjësve që të mos përgjigjen në email.
Megjithatë, vetë Trump e quajti idenë për emailin ‘gjeniale’.
Email-i nga një adresë e burimeve njerëzore në Zyrën e Menaxhimit të Personelit filloi të mbërrinte te miliona punonjës federalë të shtunën, duke shkaktuar pasiguri dhe deklarata kontradiktore nga zyrtarët e lartë.
Duke dhënë mbështetjen e tij të hënën, Trump tha: “Ne po përpiqemi të zbulojmë nëse njerëzit po punojnë dhe kështu po u dërgojmë një letër njerëzve: Ju lutemi na tregoni se çfarë bëtë javën e kaluar. Nëse njerëzit nuk përgjigjen, është shumë e mundur që të mos ketë një person të tillë ose të mos punojnë. Dhe atëherë nëse nuk përgjigjesh, sikur je gjysmë i pushuar nga puna, ose je pushuar nga puna, sepse shumë njerëz nuk po përgjigjen sepse as që ekzistojnë”.
Musk kishte postuar në platformën e tij X të shtunën: “Të gjithë punonjësit federalë së shpejti do të marrin një email që kërkon të kuptojë se çfarë kanë bërë javën e kaluar. Mospërgjigja do të merret si dorëheqje”.
/rtsh.al/
