Presidenti i zgjedhur amerikan, Donald Trump, i ka kërkuar Gjykatës së Lartë amerikane që të vonojë një ndalim të ardhshëm të TikTok-ut, ndërsa po punon edhe për një "rezolutë politike" për këtë.
Avokati i tij paraqiti një dokument ligjor të premten në gjykatë që thotë se Trump "kundërshton ndalimin e TikTok" dhe kërkon kohë për të zgjidhur çështjen nëpërmjet mjeteve politike sapo të marrë detyrën.
Më 10 janar, gjykata duhet të dëgjojë argumentet mbi një ligj amerikan që kërkon që pronari kinez i TikTok, ByteDance, t'ia shesë kompaninë një firme amerikane ose të përballet me një ndalim më 19 janar, një ditë para se Trump të marrë detyrën.
Zyrtarët dhe ligjbërësit e SHBA-së e kishin akuzuar ByteDance për lidhje me qeverinë kineze, të cilën firma e mohon. Këto dyshime për një aplikacion që ka 170 milionë përdorues në SHBA e çuan Kongresin të miratojë një projekt-ligj në prill.
TikTok dhe ByteDance kanë ngritur sfida të shumta ligjore kundër ligjit, duke argumentuar se ai kërcënon mbrojtjen amerikane të fjalës së lirë. Pa asnjë blerës të mundshëm që të materializohet deri tani, shansi përfundimtar i kompanisë për të prishur vendimin e ndalimit ka qenë nëpërmjet Gjykatës së Lartë amerikane.
Ndërsa Gjykata e Lartë ka refuzuar më parë të veprojë mbi një kërkesë për një urdhër urgjent kundër ligjit, ajo ra dakord të lejojë TikTok, ByteDance dhe qeverinë e SHBA të mbrojnë qëndrimet e tyre në 10 janar, vetëm 9 ditë përpara se ndalimi të hyjë në fuqi.
Trump u takua me CEO-n e TikTokShou Zi Chew në pronën e tij Mar-a-Lago në Florida javën e kaluar.
Në paraqitjen e tij gjyqësore të premten, Trump tha se çështja përfaqëson "një tension të pashembullt, të ri dhe të vështirë midis të drejtave të fjalës së lirë nga njëra anë, dhe shqetësimeve të politikës së jashtme dhe sigurisë kombëtare".
Departamenti amerikan i drejtësisë ka argumentuar se lidhjet e dyshuara kineze me TikTok paraqesin një kërcënim për sigurinë kombëtare dhe qeveri të shumta shtetërore kanë ngritur shqetësime në lidhje me aplikacionin popullor të mediave sociale.
Gati dy duzina prokurorësh të përgjithshëm të shtetit të udhëhequr nga Austin Knudsen i Montanas i kanë kërkuar Gjykatës së Lartë të respektojë ligjin që detyron ByteDance dhe TikTok të heqin dorë.
Trump ka thënë publikisht se është kundër ndalimit.
/rtsh.al/
