Koha e ditës kur pini një filxhan kafe mund të ulë rrezikun e një vdekjeje të parakohshme. Një studim zbuloi se njerëzit që pinin kafe në mëngjes kishin një rrezik më të ulët për të vdekur nga sëmundjet kardiovaskulare dhe kishin një rrezik vdekshmërie më të ulët se konsumatorët e kafesë gjatë gjithë ditës, por kërkimet nuk mund të vërtetonin nëse kafeja ishte shkaku i vetëm.
Dr. Lu Çi, studiues kryesor dhe drejtor i Qendrës Kërkimore në Universitetin Tulane, tha se ndërsa studimi nuk tregon pse pirja e kafesë në mëngjes zvogëlon rrezikun, një shpjegim mund të jetë se konsumi më vonë gjatë ditës mund të prishë orën e brendshme të trupit të një personi. Studimi u botua të mërkurën Në Gazetën Evropiane të Zemrës.
Dr. Çi tha se duhen studime të mëtejshme për të parë nëse gjetjet e tyre mund të vërehen edhe në popullsi të tjera, duke shtuar: "Ne kemi nevojë për prova klinike për të testuar ndikimin e mundshëm të ndryshimit të kohës së ditës kur njerëzit pinë kafe”.
"Ky studim nuk na tregon pse pirja e kafesë në mëngjes zvogëlon rrezikun e vdekjes nga sëmundjet kardiovaskulare. Një shpjegim i mundshëm është se konsumimi i kafesë pasdite ose në mbrëmje mund të prishë ritmet e ciklit 24-orësh të ndryshimeve fizike, mendore dhe të sjelljes dhe nivelet e hormoneve të tilla si melatonina. Kjo, nga ana e saj, çon në ndryshime në faktorët e rrezikut kardiovaskular si inflamacioni dhe tensioni i gjakut", shpjegoi ai.
Studiuesit nga Universiteti Tulane në Nju Orlins, panë 40.725 të rritur që kishin marrë pjesë në Anketën Kombëtare të Ekzaminimit të Shëndetit dhe të Ushqyerit në SHBA midis viteve 1999 dhe 2018.
Ata u pyetën për konsumin e përditshëm të ushqimit dhe pijeve dhe nëse pinin kafe, sa dhe kur.
"Duke pasur parasysh efektet që kafeina ka në trupin tonë, ne donim të shihnim nëse koha e ditës kur pini kafe ka ndonjë ndikim në shëndetin e zemrës," shpjegoi Dr. Çi.
Ndërsa hulumtimet e kaluara kanë zbuluar se pirja e moderuar e kafesë mund të ketë përfitime shëndetësore, ky ishte "studimi i parë që testonte modelet e kohës së pirjes së kafesë dhe rezultatet shëndetësore", shtoi ai.
Sipas hulumtimit, 36% e atyre që merrnin pjesë ishin pirës të kafesë së mëngjesit dhe 14% e pinin gjithë ditën.
Dr. Çi dhe ekipi i tij gjurmuan pjesëmarrësit për gati një dekadë, duke parë të dhënat e tyre të informacionit dhe shkaqet e vdekjes gjatë asaj periudhe kohore.
Gjatë ndjekjes pas pothuajse 10 vjetësh, 4.295 njerëz vdiqën, duke përfshirë 1.268 vdekje të lidhura me sëmundjet kardiovaskulare.
Studiuesit zbuluan se pirësit e kafesë në mëngjes kishin 16% më pak gjasa të kishin vdekur krahasuar me ata që nuk pinin kafe dhe 31% më pak të ngjarë të kishin vdekur nga sëmundjet e zemrës. Ata gjithashtu nuk panë reduktim të rrezikut për pirësit e kafesë gjatë gjithë ditës krahasuar me ata që nuk pinin kafe.
"Pirja e kafesë në mëngjes mund të shoqërohet më fort me një rrezik më të ulët të vdekshmërisë sesa pirja e kafesë më vonë gjatë ditës," shkruan ata në gazetën kërkimore.
Studiuesit thanë se sasitë më të larta të marrjes së kafesë ishin "ndjeshëm" të lidhura me një rrezik më të ulët vdekjeje, por vetëm tek njerëzit që pinin kafe në mëngjes krahasuar me ata që pinin kafe gjatë gjithë ditës./ BBC
/rtsh.al/
