Kryeministri Edi Rama, ka reaguar ashpër ndaj vendimit të Gjykatës Speciale në Hagë për t’i mohuar ish-presidentit të Kosovës, Hashim Thaçi, të drejtën për të marrë pjesë në varrimin e babait të tij.
Përmes një postimi në platformën “X”, më herët Twitter, Rama e cilësoi vendimin si një “nivel të ri të ulët” nga një gjykatë që, sipas tij, e ka kthyer drejtësinë ndërkombëtare në një farsë dhe të drejtat demokratike në fjalë boshe.
“Një nivel i ri i ulët nga një gjykatë e turpshme, që e ka kthyer drejtësinë ndërkombëtare në një farsë, të drejtat demokratike në fjalë boshe dhe vullnetin e mirë të Parlamentit të Kosovës në bumerangun më brutal!” – shkruan Rama.
Organizata e Veteranëve të Luftës së Ushtrisë Çlirimtare të Kosovës (OVL UÇK) përmes një postimi në rrjetin social Facebook, ka shprehur indinjatën dhe revoltën ndaj këtij vendimi.
Sipas OVL UÇK-së, refuzimi i Gjykatës Speciale për të lejuar Thaçin të japë lamtumirën e fundit babait të tij është një veprim i padrejtë dhe çnjerëzor, i cili bie ndesh me vlerat universale të humanizmit dhe drejtësisë.
/rtsh.al/
