Struktura e Posaçme ndaj Krimit të Organizuar dhe Korrupsionit ka kërkuar dënimin e kryebashkiakut të Devollit Eduard Duro me 1 vit burg dhe heqje të të drejtës për të ushtruar funksione për 5 vite.
Të njëjtin dënim prokurori Dritan Prençi kërkoi edhe për 4 zyrtarët e tjerë, përkatësisht Astrit Seferkolli, Gazment Haxhia, Gazment Mali dhe Vosjava Bregu.
Kryebashkiaku i Devollit Eduard Duro u mor zyrtarisht i pandehur nga SPAK më 29 tetor të vitit të kaluar.
Ai akuzohet se licencoi një biznes, pikë karburanti në Bilisht, që ishte ndërtim pa leje.
Hetimi i SPAK erdhi pas një kallëzimi të depozituar në Prokurorinë e Posaçme Antikorrupsion, nga një subjekt tjetër.
Në këtë dosje, veç Eduard Duros, janë hetuar edhe 4 punonjës të Bashkisë së Devollit, mes tyre specialistë të taksave dhe sekretari i përgjithshëm i Bashkisë së këtij qyteti për të cilët është kërkuar i njëjti dënim nga SPAK.
/rtsh.al/
