Aksionet e prodhuesve të njohur të vaksinave shënuan dje një rënie, pasi presidenti i sapozgjedhur Donald Trump shpalli Robert F. Kennedy Jr. si sekretarin e ardhshëm të Departamentit të Shëndetësisë dhe Shërbimeve Njerëzore, njoftoi CNN.
Një orë përpara se shitblerjet të mbylleshin, ndërsa raportet e lajmeve për zgjedhjen e Trump filluan të dilnin, kompania e prodhimit të vaksinave kundër Covid-19 “Moderna” regjistroi një rënie deri në 6%, ndërsa “Pfizer” shënoi një rënie me pothuajse 2%. “Novavax”, i cili krijoi një vaksinë të bazuar në proteina regjistroi një rënie me pothuajse 6%.
Kennedy ka qenë një nga teoricienët më të shquar të konspiracionit kundër vaksinave të vendit për vite me rradhë dhe shpesh ka përhapur disinformata për sigurinë dhe efikasitetin e vaksinave.
Javën e kaluar, Kennedy tha se “menjëherë” do të fillonte studimin e sigurisë dhe efikasitetit të vaksinës.
“Siguria dhe shëndeti i të gjithë amerikanëve është roli më i rëndësishëm i çdo administrate dhe Departamentit të Shëndetësisë dhe Shërbimeve Njerëzore të Shteteve të Bashkuara (HHS”do të luajë një rol të madh për të ndihmuar që të gjithë të mbrohen nga kimikatet e dëmshme, ndotësit, pesticidet, produktet farmaceutike dhe aditivët ushqimorë që kanë kontribuar në krizat shëndetësore në këtë vend”, tha Trump në X.
Sipa ATSH
/ rtsh.al /
