Presidenti i Koresë së Jugut, Moon Jae-in deklaroi se do të përpiqet të vendosë paqen dhe dialogun me Korenë e Veriut për aq kohë sa është në detyrë.
Në fjalimin e tij në parlament, Moon tha se do të "punojë deri në fund për të ndihmuar në vendosjen e një rendi të ri paqeje përmes dialogut dhe diplomacisë" në Gadishullin Korean.
Udhëheqësi i Koresë së Jugut tha se ai ndihmoi në organizimin e samitit, ku ish-presidenti amerikan, Donald Trump dhe homologu i tij koreano-verior Kim Jong-un u takuan për herë të parë më 12 qershor 2018, por se përpjekjet e tyre për paqen nuk kanë përfunduar ende.
Mandati i Moon, i cili luajti një rol të rëndësishëm në zhvillimin e negociatave bërthamore midis SHBA-së dhe Koresë së Veriut, skadon në maj të vitit 2022.
Kundërshtarët thonë se qasja e lartpërmendur e Moon-it dobësoi presionin ndërkombëtar ndaj fqinjëve të tij veriorë, të cilët shfaqën një qëndrim konstruktiv në Gadishullin Korean gjatë gjithë udhëheqjes së tij.
Nga ana tjetër Moon shihet nga mbështetësit e tij si një ndërmjetës për ndërtimin e paqes.
Testet raketore të Koresë së Veriut përshkallëzojnë tensionet
Koreja e Veriut, e cila nuk ka marrë pjesë në negociatat bërthamore për rreth 2 vjet, stërvitjen e përbashkët ushtarake të SHBA-së dhe Koresë së Jugut në gusht e perceptoi si një kërcënim dhe së fundmi ka shtuar testet e saj raketore.
Koreja e Veriut më 15 shtator kreu teste balistike me rreze të shkurtër dhe teste raketash më 28 shtator, të cilat Agjencia Qendrore e Lajmeve të Koresë së Veriut i përshkroi si "hipersonik i sapo zhvilluar".
Nga ana tjetër, Koreja e Veriut, e cila testoi një "raketë të re balistike të lëshuar nga një nëndetëse" më 19 tetor, u përball me reagimin e komunitetit ndërkombëtar.
Ministria e Punëve të Jashtme të Koresë së Veriut deklaroi se testet e raketave në fjalë ishin "ushtrim ligjor i të drejtës së vetëmbrojtjes".
Negociatat bërthamore mes SHBA-së dhe Koresë së Veriut
Ish-presidenti amerikan, Donald Trump dhe lideri i Koresë së Veriut, Kim u takuan për herë të parë në Singapor më 12 qershor 2018 dhe ranë dakord për denuklearizimin e Gadishullit Korean dhe vendosjen e paqes së qëndrueshme.
Të dy liderët u takuan edhe një herë në Vietnam më 26-27 shkurt 2019, por samiti përfundoi më shpejt se sa pritej dhe pa një marrëveshje. Së fundmi, më 30 qershor 2019, të dy liderët u takuan në zonën e demilitarizuar midis Koresë së Veriut dhe Koresë së Jugut dhe vendosën të vazhdojnë procesin e negociatave bërthamore.
Takimet në nivel pune midis dy vendeve të mbajtura në Suedi në tetor 2019 u ndërprenë sepse, sipas koreano-veriorëve, amerikanët vazhduan "qëndrimet e tyre të vjetra"./AA
