Presidenti i Republikës së Shqipërisë, Sh. T. Z. Bajram Begaj, ishte sot në Mirditë, ku mori pjesë në formalizimin e binjakëzimit mes Bashkisë së Mirditës dhe Komunës arbëreshe të San Cosmo Albanese të Italisë, një iniciativë e tij për të forcuar marrëdhëniet midis shqiptarëve.
“Më vjen mirë që sot jam së bashku me Kryetarin e Fondacionit Arbëresh të Kalabrisë, me Kryetarin e Bashkisë së San Cosmo Albenese dhe Kryetarin e Bashkisë së Junikut në Kosovë. E ku më mirë se në Mirditë mund të bëhen bashkë Arbëria, Shqipëria dhe Kosova. Unë ndihem mjaft i lumtur që më së fundi është një vend ku ne jemi bashkë. Së bashku mendoj se mund të bëjmë gjëra të mira. Ku ka vullnet dhe dëshirë, gjithmonë gjenden mundësi dhe këto mundësi gjithmonë duhet të shfrytëzohen në të mirë të qytetarëve”.
Presidenti Begaj përgëzoi Kryetarin e Bashkisë së Mirditës, zotin Albert Melushi, për projektin e përbashkët me Komunën e Junikut, “Mirditë-Junik”, një iniciativë për të krijuar një infrastrukturë të qëndrueshme turistike në zonën ndërkufitare, e mbështetur nga Bashkimi Evropian.
“Në fakt, nuk ka si të gjesh më mirë se Mirdita. Në Mirditë je në vendin e historisë, në vendin e patriotizmit dhe në vendin e mikpritjes e të bujarisë. Projekti i quajtur Arbëria, Albania dhe Italia, në kuadër të të cilit u zhvillua binjakëzimi midis dy bashkive, është një projekt madhor. Sot në Mirditë dua t’i jap udhë një tjetër iniciative për bashkimin e vlerave të shqiptarëve kudo janë, për ruajtjen e vëllazërisë, të kulturës e të traditës sonë, që do ta pagëzoj me emrin “Rrënjët”.
Ashtu siç ushqejmë rrënjët që të rritet pema e të kemi frytet e saj, kështu ne së bashku do të punojmë për të forcuar lidhjet ndër shqiptare. Duhet të punojmë që këtë bashkëpunim ta forcojmë, të ndihmojmë njëri-tjetrin, të mbështesim njëri-tjetrin”, - u shpreh Kreu i Shtetit.
Në festivalin që u organizua në sheshin e Mirditës, “Abat Doçi”, Presidenti i Republikës uroi Krishtlindjen për çdo qytetar të Mirditës dhe të Shqipërisë.
“Për mua është vërtet kënaqësi e madhe të jem sot këtu në Mirditë. Është kënaqësi e veçantë të jem këtu në prag Krishtlindjeje dhe dua të uroj secilin nga ju gëzuar Krishtlindjen! Qoftë një vit i mbarë 2025-ta, sa më i lumtur! Uroj paqe, mirësi, dashuri dhe shumë mirëqenie për secilin nga ju! Gëzuar!"
Presidenti vizitoi edhe panairin e ngritur në shesh të qytetit ku u takua dhe përgëzoi mjeshtrit mirditorë që punojnë për ruajtjen e trashëgimisë kulturore.
/rtsh.al/
