Temperaturat e larta do të mbizotërojnë, por jo vapë e nxehtë – Autoritetet në Athinë dhe Kretë janë në gatishmëri
Përqendrimet e pluhurit afrikan do të jenë në rritje në ditët në vijim në Greqi, ndërsa sipas Shërbimit Kombëtar Meteorologjik (EMY), pritet një rritje graduale e temperaturës.
Autoritetet janë në alarm “të kuq” për shtatë ditët e ardhshme, pasi sipas parashikimeve të ekspertëve pritet të ketë një përqendrim të madh të pluhurit afrikan në atmosferë.
Nëse parashikimet vërtetohen, përqendrimi i pluhurit afrikan në atmosferë do të jetë veçanërisht i lartë dhe spitalet dhe autoritetet kompetente do të duhet të mobilizohen menjëherë, për grupet vulnerabël dhe qytetarët me probleme të frymëmarrjes.
Më konkretisht, nga dita e sotme, e premte, 17 maj, deri të enjten, 23 maj, pluhuri afrikan pritet të mbulojë vendin, ndërsa do të ketë edhe rritje të temperaturës. Efektet do të intensifikohen gjatë fundjavës dhe do të zgjasin të paktën deri të enjten. Deri më tani, ato pritet të tërhiqen gradualisht të premten.
Parashikimet tregojnë se zonat ku fenomeni do të jetë më intensiv janë Kreta dhe Athina. Në këto dy zona pritet një përqendrim i lartë i pluhurit afrikan, por të dhënat e deritanishme nuk tregojnë se fenomeni do të ngjajë me pamjet e frikshme të ndodhura muajin e kaluar. Efektet do të jenë më të dobëta në Peloponez, ndërsa Greqia e Veriut nuk duket të jetë prekur deri më tani.
Në të njëjtën kohë, në të njëjtat ditë merkuri do të rritet ndjeshëm dhe temperaturat do të lëvizin në kufijtë e valës së të nxehtit, por pa i tejkaluar ato. Në Kretë temperaturat “do të arrijnë” deri në 35 gradë Celsius.
/rtsh.al/
