Ish-kryetarja e Dhomës së Përfaqësuesve të SHBA-së, Nancy Pelosi, ka fajësuar presidentin Joe Biden për humbjen e demokratëve në zgjedhjet presidenciale. Në një intervistë për New York Times, ajo tha se demokratët mund të kishin dalë më mirë në zgjedhjet e së martës nëse Biden do të kishte dalë më shpejt nga gara.
"Nëse presidenti do të kishte dalë më shpejt nga gara, mund të kishte pasur kandidatë të tjerë në garë", u shpreh ajo.
Pelosi raportohet gjerësisht se ka udhëhequr lëvizjen e demokratëve për të larguar Biden, i cili u tërhoq nga gara në fund të korrikut pas javësh presioni, pas një debati të dobët kundër Donald Trump. Pasi Biden përfundoi garën e tij, ai shpejt miratoi zëvendëspresidenten Kamala Harris për t' zënë vendin. Ajo pësoi një humbje të rëndë ndaj Presidentit të zgjedhur Trump të martën.
"Ne prisnim që, nëse presidenti do të tërhiqej shpejt, do të kishte zgjedhje të hapura paraprake."
Një primare e hapur do të kishte përfshirë një numër kandidatësh demokratë që konkurronin për t'u zgjedhur nga anëtarët e partisë për të pasuar Biden si kandidatin e tyre për Shtëpinë e Bardhë. Pelosi argumentoi se Harrisit do t’i kishte bërë mirë një proces i tillë primar dhe se do ta kishte bërë atë "më të fortë për të shkuar përpara".
"Por ne nuk do ta dimë kurrë me siguri këtë. Ne do jetojmë me atë që ndodhi," tha kongresmenja nga Kalifornia, e cila u rizgjodh në mandatin e saj të 20-të të martën./ BBC
/rtsh.al/
