Ushtria izraelite ka dërguar divizione shtesë prej 10 mijë trupash për të marrë pjesë në luftën tokësore në Libanin jugor.
Shtimi i një numri kaq të madh ushtarësh vjen pavarësisht pretendimit të Izraelit se operacioni i tij në Liban është “i kufizuar, i lokalizuar, i synuar” - një përshkrim që përsëriti sot.
Forcat e Mbrojtjes të Izraelit (IDF) kanë urdhëruar civilët libanezë në dhjetëra fshatra që të lënë shtëpitë e tyre dhe të lëvizin në veri të lumit Aëali, i cili është rreth 30 milje në veri të kufirit me Izraelin.
Ushtria tha se Divizioni i 36-të i IDF-së dhe forcat shtesë po i bashkoheshin operacioneve të saj që kishin në objektiv Hezbollahun e mbështetur nga Irani.
Divizioni përfshin ushtarë nga Brigada Golani, Brigada 188 e Blinduar dhe Brigada e 6-të e Këmbësorisë. Ata shoqërohen nga Forcat Ajrore izraelite dhe Brigada e 282-të e Artilerisë, shtoi ajo.
Ushtria muajin e kaluar zhvendosi divizionin e 98-të elitar nga Gaza në Izraelin verior.
Numri i trupave izraelite në terren në Libanin jugor mbetet i paqartë pas njoftimit të ushtrisë të martën për një inkursion përtej kufirit të saj verior.
Ushtria izraelite ka organizuar disa “sulme sporadike” përgjatë kufirit Liban-Izrael, por trupat e saj nuk kanë mbetur në tokën libaneze.
Vlerësimi se Izraeli nuk ka nisur ende një pushtim në shkallë të plotë u mbështet nga dy burime të tjera të sigurisë libaneze të nivelit të lartë, transmeton CNN.
Trupat izraelite hodhën bazat për inkursionin ditët e fundit, duke shtuar sulmet ajrore që kanë vrarë më shumë se një mijë njerëz, kanë shkatërruar shtëpi dhe kanë zhvendosur rreth 1 milionë njerëz në Liban.
