Ish-ministrja e Financave, Anila Denaj u paraqit në Prokurorinë e Posaçme (SPAK) këtë të premte, ku është pyetur në lidhje me koncesionin e sterilizimit të pajisjeve mjekësore. Denaj dëshmoi për rreth 2 orë në SPAK.
Pas daljes nga Prokuroria e Posaçme, ish-ministrja tha se dha informacione në lidhje me koncesionin për kohën kur punonte në Ministrinë e Financave.
“Isha për të sqaruar informacionet për të cilat kam dijeni gjatë kohës që kam punuar në Ministrinë e Financave, kur ky koncesion ka qenë në diskutim,” tha Denaj.
Në lidhje me këtë koncesion kanë dëshmuar në SPAK në korrik të vitit 2022 edhe ish-ministri i Shëndetësisë, Ilir Beqaj dhe ish-zëvendësministri Shëndetësisë, Klodian Rrjepaj.
SPAK ka nisur hetimet në lidhje me dy tendera në shëndetësi, për sterilizimin dhe check-up. Koncesioni i sterilizimit është denoncimi i parë i bërë në SPAK, i depozituar nga Nisma Thurje më 23 dhjetor të 2019, tre ditë pas themelimit të Prokurorisë së Posaçme.
/rtsh.al/
