Këshilli i Lartë i Prokurorisë zhvilloi ditën e mërkurë një seancë plenare, ku të pranishëm në mbledhje ishin anëtarët e Këshillit dhe përfaqësues nga Ministria e Drejtësisë dhe programi OPDAT.
Këshilli miratoi unanimisht shpalljen e pozicionit vakant për drejtues për tre prokurori të juridiksionit të përgjithshëm, respektivisht në Berat, Durrës dhe Kukës. Caktimi i drejtuesve do të bëhet përmes procedurës së ngritjes në detyrë.
Gjithashtu u shpallën edhe 6 pozicione vakante në sistemin e prokurorisë, respektivisht 4 vende në prokurorinë e Tiranës dhe 2 në Elbasan. Këto vakanca do të plotësohen përmes procedurës së transferimit me pëlqim.
"Pasi u njoh me relacionet përkatëse, Këshilli miratoi kohëzgjatjen e qëndrimit në detyrë për 2 prokurorë, Bujar Sheshi dhe Hysni Keta. Prokurorët do të qëndrojnë në detyrë për një periudhë kohore 3- vjeçare, deri në mbushjen e moshës 70 vjeç. Në vijim, Këshilli miratoi propozimin e Komisionit Disiplinor, për përfundimin e procedimit disiplinor të filluar ndaj ish-magjistrates Elina Kombi, pa vendim përfundimtar.", thuhet në njoftim.
Me votë unanime, u miratua edhe pezullimi i procedimit disiplinor të filluar ndaj magjistratit Lorenc Mërkuri, me detyrë prokuror në Prokurorinë pranë Gjykatës së Shkallës së Parë Sarandë. Përmes këtij vendimi u miratua edhe vijimi i shqyrtimit të procedimit disiplinor nisur nga ILD.
/rtsh.al/
