Protestuesit izraelitë kanë bllokuar rrugët në Tel Aviv të mërkurën për të bërë presion ndaj qeverisë së kryeministrit Benjamin Netanjahu me qëllimin e arritjes së marrëveshjes për shkëmbimin e të burgosurve me palestinezët.
Protestuesit, duke përfshirë të afërm të izraelitëve të mbajtur rob në Gaza, bllokuan një rrugë në zonën Metzudat Ze'ev në Tel Aviv, e cila përfshin selinë e Partisë Likud të Netanjahut.
“Kabineti i vdekjes po vret pengje”, shkruhet në një pankartë të madhe të mbajtur nga protestuesit.
Protestat masive shpërthyen në Izrael që nga e diela pasi ushtria tha se kishte gjetur trupat e gjashtë pengjeve në Gazën jugore.
Hamasi tha se pengjet u vranë në sulmet ajrore izraelite në enklavën palestineze.
Izraeli vlerëson se mbi 100 pengje mbahen ende nga Hamasi në Gazë, disa prej të cilëve besohet se janë vrarë tashmë.
Për muaj të tërë, SHBA, Katari dhe Egjipti janë përpjekur të arrijnë një marrëveshje midis Izraelit dhe Hamasit për të siguruar një shkëmbim të të burgosurve dhe një armëpushim dhe për të lejuar hyrjen e ndihmave humanitare në Gazë.
Por përpjekjet e ndërmjetësimit kanë ngecur për shkak të refuzimit të Netanjahut për të përmbushur kërkesat e Hamasit për të ndaluar luftën.
Izraeli ka vazhduar ofensivën e tij brutale në Rripin e Gazës që nga sulmi i Hamasit më 7 tetor, pavarësisht një rezolute të Këshillit të Sigurimit të OKB-së që kërkon një armëpushim të menjëhershëm.
Sipas autoriteteve lokale shëndetësore, Më shumë se 40 mijë palestinezë, kryesisht gra dhe fëmijë, janë vrarë që atëherë dhe rreth 94,300 të tjerë janë plagosur,
Një bllokadë e vazhdueshme e enklavës ka çuar në mungesa të mëdha të ushqimit, ujit të pastër dhe ilaçeve, duke lënë pjesën më të madhe të rajonit në gërmadha.
Izraeli përballet me akuza për gjenocid për veprimet e tij në Gaza në Gjykatën Ndërkombëtare të Drejtësisë.
/rtsh.al/
