Prokuroria e Posaçme ka kërkuar 19 vite burg për Talo Çelën, I cili akuzohet si pjesëmarrës në grabitjen e 4.6 milionë eurove në aeroportin Nënë Tereza në Rinas. Ngjarja ka ndodhur 5 vite më parë, në prill të 2019-ës.
Çela është ende në arrati, duke iu fshehur policisë. Pas pretencës së prokurorisë avokati i Talon Çelës ka kërkuar kohë që të njihet me materialin, mbi të cilin SPAK kërkoi 19 vite burg.
SPAK ka bërë pjesë të dosjes në hetim edhe bisedat e Talo Çelës në SKY ECC, me anëtarët e tjerë të grupit, ku shprehte shqetësim se mund të gjendeshin prova për përfshirjen e tij në grabitjen në Rinas.
Gjykata e Posaçme, e përbërë nga Erjon Bani, Rudina Palloj dhe Elsa Ulliri, kanë caktuar më pas edhe seancën gjyqësore, e cila do të zhvillohet më datë 21 nëntor ora 10.00, seancë në të cilën pritet të shpallet vendimi për Çelën.
Çela u shpall në kërkim në kuadër të operacionit të koduar “Plumbi i Artë”, që çoi në kapjen e Nuredin Dumanit, Henrik Hoxhajt, si dhe të disa personave të tjerë, pjesë e botës së krimit.
Lidhur me grabitjen në Rinas GJKKO ka dënuar 2 vite më parë me 122 vite burg, 7 të pandehurit pjesë e grupit criminal: Klement Çala me 20 vite burg, ndërsa Oltion Veseli, Renaldo Sulaj, Saimir Cela, Oltion Pikli, Alkon Bengasi dhe Eldi Çala me 17 vite burg. Ata po e vuajnë dënimin në një burg të sigurisë së lartë.
/rtsh.al/
