Sekretari i Përgjithshëm i NATO-s, Mark Rutte, ka kërkuar nga Gjermania që të rrisë ndjeshëm shpenzimet e saj për mbrojtjen dhe të përmirësojë prodhimin e armëve. Ai u shpreh për median gjermane BILD se Berlini duhet të "shpenzojë më shumë dhe të prodhojë më shumë."
Rutte e vlerësoi Gjermaninë për veprimet që ka ndërmarrë deri tani që nga fillimi i luftës në Ukrainë, duke theksuar se ka bërë shumë gjëra të drejta. Megjithatë, ai shtoi se, për shkak të madhësisë së ekonomisë gjermane, Gjermania duhet të bëjë më shumë, sidomos për shkak të kërcënimit nga Rusia.
Nga pikëpamja e Rutte, kërcënimet nuk vijnë vetëm nga Rusia, por edhe nga Kina, e cila ka rritur ndjeshëm kapacitetet e saj ushtarake. Ai gjithashtu njoftoi se, për të ardhmen, do të rritet kuota e shpenzimeve të mbrojtjes mbi dy për qind. Më shumë se dy të tretat e vendeve të NATO-s tashmë shpenzojnë më shumë se dy për qind për armatim, falë ndikimit të presidentit të SHBA-së, Donald Trump. Në muajt e ardhshëm, vendet aleate do të diskutojnë detajet për këtë rritje, me fokus në samitin e ardhshëm të NATO-s që do të mbahet në Hagë, Holandë, në qershor.
Rutte u shpreh se shpenzimet do të jenë shumë më të larta se dy për qind. Gjatë këtij samiti, diplomatët pritet të negociojnë për një objektiv më të lartë, që mund të arrijë deri në 3 ose 3.5 për qind. Rutte apeloi për një solidaritet më të madh brenda aleancës dhe tha se NATO duhet të qëndrojë e bashkuar. Ai theksoi se barra e shpenzimeve duhet të ndahet në mënyrë të drejtë mes Evropës, Kanadasë dhe SHBA-së, në mënyrë që asnjëra prej palëve të mos mbajë një peshë të tepërt.
/rtsh.al/
