Një tjetër gazetar palestinez u vra në një sulm izraelit në Rripin e Gazës të shtunën, duke e çuar numrin e gazetarëve të
vrarë në 161 që nga 7 tetori 2023.
Burime mjekësore thanë për Anadolu se ushtria izraelite kishte në shënjestër shtëpinë e Muhamed Jasserit në veri të Rripit të Gazës.
Sulmi vrau Jasserin, gruan e tij dhe dy fëmijët e tij, duke rritur numrin e gazetarëve palestinezë të vrarë në Gaza që nga 7 tetori në 161,
shtuan burimet.
Duke shpërfillur një rezolutë të Këshillit të Sigurimit të OKB-së që kërkon armëpushim të menjëhershëm, Izraeli ka vazhduar ofensivën e tij
brutale në Rripin e Gazës që nga një sulm i 7 tetorit nga grupi i rezistencës palestineze, Hamas.
Më shumë se 38.800 palestinezë janë vrarë që atëherë, kryesisht gra dhe fëmijë, dhe mbi 89.400 janë plagosur, sipas autoriteteve lokale
shëndetësore.
Mbi nëntë muaj pas fillimit të sulmeve izraelite, pjesë të gjera të Gazës qëndrojnë në gërmadha, krahas një bllokade paralizuese të ushqimit,
ujit të pastër dhe ilaçeve.
Izraeli akuzohet për gjenocid në Gjykatën Ndërkombëtare të Drejtësisë, e cila në vendimin e saj të fundit urdhëroi Tel Avivin të ndalonte
menjëherë operacionin e tij ushtarak në qytetin jugor Rafah, ku më shumë se 1 milion palestinezë kishin kërkuar strehim nga lufta përpara se të pushtohej më 6 maj.
/ rtsh.al /