Një i ri shqiptar që drejtonte makinën luksoze "Lamborghini" me 306 km/h në tunelin e Kalimashit është shoqëruar në polici dhe është gjobitur me 100.000 lekë, njofton policia. Ajo ka bërë të ditur gjithashtu se të riut, i identifikuar si Aleks Vishai, i është bllokuar mjeti që i rrezikoi jetën edhe një familjeje tjetër duke bërë manovra të rrezikshme në tunel.
Policia e mori vendimin e saj pas publikimit në rrjetet sociale, të një videoje në të cilën shfaqej një automjet që qarkullonte me shpejtësi 306 km/h në Tunelin e Kalimashit.
Policia Rrugore e Tiranës bën thirrje për drejtuesit e automjeteve që të zbatojnë me rigorozitet rregullat e qarkullimit rrugor, ndërsa u kërkon të ndalojnë publikimin në rrjetet sociale të materialeve që kanë karakter joedukativ për sigurinë rrugore, njoftoi policia.
Pak ditë më parë opiniomi shqiptar u trondit nga një aksident i rëndë tek rrethrrotullimi i TEG-ut afër Tiranës. Nga përplasja e një makine që po ecte me shpejtësi afro 200 km/h një i ri dhe dy shoqet e tij humbën jetën.
Policia rrugore ka ndërmarrë kontrolle të shumta në të gjitha akset rrugore, veçanërisht ata që konsiderohen si akset e vdekjes ne autostradat shqiptare.
Një ditë më parë parlamenti shqiptar miratoi disa ndryshime në Kodin Rrugor, për të mënjanuar aksidentet rrugore.
/ rtsh.al /