Presidenti Volodymyr Zelenskiy nënshkroi një dekret të martën duke deklaruar zyrtarisht perspektivën e çdo bisedimi ukrainas me udhëheqësin e Kremlinit Vladimir Putin "të pamundur", por duke e lënë derën e hapur për bisedimet me Rusinë, njofton Reuters.
Dekreti zyrtarizoi komentet e bëra nga Zelenskiy të premten pasi presidenti rus shpalli katër rajone të okupuara të Ukrainës si pjesë e Rusisë, në atë që Kievi dhe Perëndimi thanë se ishte një farsë e paligjshme.
"Ai (Putini) nuk e di se çfarë është dinjiteti dhe ndershmëria. Prandaj, ne jemi gati për një dialog me Rusinë, por me një president tjetër të Rusisë," tha Zelenskiy të premten.
Forcat ukrainase kanë thyer mbrojtjen ruse në jug të vendit dhe kanë zgjeruar një ofensivë të shpejtë në lindje, duke rikthyer territorin në zonat e aneksuara nga Rusia, e cila pushtoi Ukrainën në shkurt.
Putin, i cili mbush 70 vjeç këtë javë, ka dominuar peizazhin politik të Rusisë për më shumë se dy dekada dhe mund të kandidojë për postin edhe dy herë të tjera sipas reformave kushtetuese që ai kryesoi, duke qëndruar potencialisht në pushtet deri në vitin 2036. ( Sipas Reuters )
