Bullgaria është afër skenarit të zgjedhjeve të parakohshme, të gjashtat në vetëm tri vite, për shkak se partia e dytë më e madhe e vendit nuk ka pranuar të formojë qeverinë.
Majin e kaluar, konservatorët e partisë GERB (Qytetarët për Zhvillimin Demokratik të Bullgarisë) dhe liberalët e Vazhdojmë Ndryshimin (PP) ranë dakord të krijojnë kabinetin qeverisës me modelin e rotacionit çdo nëntë muaj.
Por PP-ja me liderin dhe ish-kryeministrin Kiril Petkov thotë se nuk do propozojë më emra për qeverinë, ndërsa partia më e madhe në vend, GERB, nuk kanë arritur të gjejnë mbështetje tjetër për koalicionin.
Partnerët në qeverisje përplasen prej muajsh për ndarjen e pozicioneve burokratike, reformën në drejtësi, organet antikorrupsion dhe shërbimet sekrete. Z. Petkov ka fajësuar kryetarin e GERB-it, Bojko Borisov (o. Boyko) "se ka frikë nga mëkatet e vjetra dhe preferon një eksplozion [politik] në Bullgari". Nga ana e tij, ish-kryeministri Borisov ka deklaruar se "deri në momentin e fundit, PP-ja ka mbajtur qëndrime poshtëruese, kanë dashur të uzurpojnë pushtetin".
Të dyja partitë kanë pranuar se përfundimi i këtij ngërçi mund të vijë pas zgjedhjeve të reja në muajt e ardhshëm - vendim ky që do të vononte më tej reformat e kërkuara nga Bashkimi Evropian.
Situata politike në vend pritet të komplikojë përpjekjet e Bullgarisë për t'i integruar me BE-në, teksa vendi synon t'i bashkohet edhe zonës Shengen gjatë vitit në vijim dhe të pranojë euron si monedhën kryesore.
Bullgaria është edhe një shtet anëtar në NATO dhe një furnizues i rëndësishëm i Ukrainës me armatime. Opinionistët shprehen se trazirat e mundshme do të promovonin retorikën proruse nga krahët më ekstremë politikë në vend. /FT, Bloomberg
/rtsh.al/