17 vende jo anëtare të Bashkimit Evropian janë ftuar në takimin e parë të një forumi të ri politik evropian që do të zhvillohet në Republikën Çeke më 6 tetor.
Shqipëria, Armenia, Azerbajxhani, Bosnja dhe Hercegovina, Gjeorgjia, Islanda, Kosova, Lihtenshtajni, Republika e Moldavisë, Mali i Zi, Maqedonia e Veriut, Norvegjia, Serbia, Zvicra, Turqia, Ukraina dhe Britania ishin të ftuara në forumin politik tha zyrtari i BE-së.
Takimi po zhvillohet përpara një samiti jozyrtar të liderëve të BE-së. Pjesëmarrësit do të diskutojnë sigurinë, migrimin dhe ndryshimet klimatike, si dhe situatën aktuale ekonomike, megjithatë nuk janë planifikuar deklarata zyrtare apo qëndrime të përbashkëta.
Mbledhja politike, e quajtur Komuniteti Politik Evropian, është ideja e presidentit francez Emmanuel Macron dhe synon të lehtësojë një shkëmbim më të ngushtë midis vendeve të BE-së dhe atyre që mbeten jashtë bllokut, qoftë me zgjedhje ose për shkak se aktualisht nuk i plotësojnë kriteret e anëtarësimit.
Macron ka thënë se shpreson ta përdorë atë për të përmirësuar bashkëpunimin me partnerët e BE-së në Evropë, duke iu referuar Ukrainës, së cilës së fundmi iu dha statusi zyrtar i kandidatit në BE, por nuk ka gjasa të bëhet anëtare e plotë e bllokut për të paktën një dekadë tjetër.
Kancelari gjerman Olaf Scholz kohët e fundit mbështeti Komunitetin Politik Evropian, por tha se ai "nuk duhet të jetë një alternativë ndaj zgjerimit të BE".
/rtsh.al/
