“Shqipëria Bëhet” dhe “Nisma Thurje” firmosin koalicion për zgjedhjet e 11 majit.
Liderët e dy partive politike, Endrit Shabani dhe Adriatik Lapaj, në një deklaratë për mediet bëmë me dije bashkimin e fuqive politike në zgjedhjet e ardhshme nën siglën “Nisma Shqipëria Bëhet”.
Ky koalicion, sipas Shabanit, do të afrojë të rinjtë për t’i dhënë fund tranzicionit dhe për të fuqizuar shtresën e mesme.
“Ajo që është më e rëndësishme, se fakti kush po bëhet bashkë dhe pse po bëhen bashkë?
Po bëhen bashkë të rinjtë për të dhënë shpresë Shqipërisë dhe fund tranzicionit, për të fuqizuar shtresën e mesme në Shqipëri dhe për ti dhënë shpresë të rinjve. Shqipëria bëhet dhe ne do ta bëjmë. Kur të vijë afati do prezantojmë dhe kandidat të e përbashkët që do jenë dhe në një listë të përbashkët”, deklaroi Shabani.
Nga ana e tij, Adriatik Lapaj sqaroi se koalicioni do të drejtohet nga një koordinues i përbashkët dhe do të funksionojë me vendime që do të merren në mënyrë kolegjiale nga anëtarët.
Po ashtu, Lapaj u shpreh se janë në negociata me subjekte të tjera, të cilat shpreson që do t’iu bashkohen në 48 orët e mbetura.
“Koncepti që duam të sjellim, është koncepti i një atdheu i punëtorëve shqiptarë dhe uroj që në këto 48 orë që kanë mbetur të shtohen dhe subjektet e tjera që ne po negociojmë.
Theksoj që z. Shabani tha se do jetë drejtuesi i koalicionit, por kjo është formale pasi koalicioni do drejtohet nga një koordinues i përbashkët.
Në aspektin thelbësor, koalicioni do funksionojë me vendime që do merren në mënyrë kolegjiale nga anëtarët e vetë. Kur të vijë afati do prezantojmë dhe kandidat të e përbashkët që do jenë dhe në një listë të përbashkët”, deklaroi Lapaj.
/rtsh.al/
