Kryekomisioneri Shtetëror i Zgjedhjeve, Ilirjan Celibashi ka folur së fundi për procesin e votimit nga jashtë, kostot e financimit dhe mënyrën e votimit për të gjithë qytetarët shqiptarë që jetojnë jashtë kufijve të vendit.
Celibashi tha se procesi i votimit, nis me krijimin e një profili si votues nga jashtë, ku përveç të dhënave, kusht është edhe ngarkimi i një fotoje të personit që ka shprehur dëshirën për votuar në zgjedhjet e 11 majit 2025.
“Si fillim, do të ngarkohet një dokument identifikimi, i cili duhet të jetë i vlefshëm që të mundësojë votimin. Pasaporta për jashtë shtetit ose letër njoftimi të jenë të vlefshme deri në datën kur janë caktuar zgjedhjet. Kur krijohet profili si votues nga jashtë, personi duhet të shfaqet me pamjen e vet nëpërmjet këtij sistemi, i cili nuk pranon regjistrimin nëse pamja juaj nuk përputhet me atë të fotos në dokumentet e identifikimit. Duhet të paraqitet personi vetë dhe jo të dërgojë njeri tjetër, pra nëpërmjet “face recognition” ti krijon edhe llogarinë tënde, por edhe aplikon për t’u regjistruar në listën e zgjedhësve. Gjithë sistemi që ne përdorim është një sistem që aplikohet në aplikacione të tjera, si banka, e sisteme të tjera dhe ky është përshtatur për regjistrimin e votuesve nga jashtë. Duhet të jetë gati maksimalisht në datën 1 janar 2025”, u shpreh ai.
Kryekomisoneri tha se përveç pjesës së sigurisë, ky aplikacion parashikon edhe lehtësinë e procesit të votimit. “Të gjitha kategoritë e votuesve mendojmë që nuk do të kenë probleme në përdorimin e këtij aplikacioni. Do të vendosim në dispozicion të votuesve edhe një sistem sqarimi dhe ndihmës, ndërsa po shikojmë mundësinë e ndërtimit të një sistemi nëpërmjet Inteligjencës Artificiale për mbështetjen e votuesve”.
Sa i takon kostove të këtyre zgjedhjeve, si për votën e Diasporës, por edhe votimin brenda vendit, Celibashi tha se : “Votimi nga jashtë rrit kostot e këtij procesi, duke llogaritur si kosto vetëm ato që lidhen me dërgimin me fletën e votimit, edhe koston e kthimit, në varësi të numrit të votuesve. Ne kemi llogaritur që për 800 mijë votues kosto në dërgim është rreth 40 milionë euro, për kthimin edhe 40 milionë të tjera. Aplikacioni kushton rreth 2-2.4 milionë euro për platformën e regjistrimit dhe përgatitjen e listës së zgjedhësve për votimin nga jashtë. Pjesa e votimit nga brenda është llogaritur nga 18-20 milionë euro”.
Celibashi saktësoj se llogaritet si kosto vetëm dërgimi të fletës, pasi ende s'ka një vendim përfundimtar nëse kthimi i fletës do të jetë kosto e votuesit apo do ta mbarti shteti.
/ rtsh.al /
