Ministria e Turizmit dhe e Mjedisit ka hedhur për konsultim publik një projektligj që parashikon rritjen e gjobave për të gjitha kompanitë që nuk respektojnë kushtet e shkarkimit të ndotësve në ajër.
Më konkretisht, projektligji propozon rritjen e gjobave për mosrespektimin e kushteve për lejet e dhëna mjedisore, si dhe për subjektet e prodhimit, importit dhe tregtimit të lëndëve djegëse.
Gjobat për lejet mjedisore të kategorisë A propozohen në nivelin e 1,3 mln deri 2,6 mln lekëve, nga 1 deri 2 mln lekë që janë në ligjin aktual. Për lejet mjedisore të kategorisë B masa e gjobës varionte nga 300 mijë deri në 500 mijë lekë, ndërsa sipas projektligjit propozohet rritja në 390 mijë lekë dhe 550 mijë lekë.
Ndërsa për lejet e mjedisit të tipit C, masa e gjobës e parashikuar në ligj në vlerën 300 mijë deri në 500 mijë lekëve nuk ndryshon. Për operatorët prodhues, importues dhe të tregtimit të lëndëve djegëse që shkelin ligjin masa e gjobës propozohet të jetë nga 1,3 deri 2,6 mln lekë nga 1 deri 2 mln lekë që është aktualisht.
/rtsh.al/
