Ju ka ndodhur të niseni për të bërë diçka dhe të harroni se për çfarë shkuat? Apo të jeni duke komunikuar dhe t’ju fshihet informacioni që keni në mendje ? Kjo simptomë quhet “ Brain Fog” ose trullosje apo përhumbje e trurit e cila ndodh kur ju nuk mund t’i mbani mënd gjërat siç bëni normalisht. Neurologia Entela Basha thotë se pas pandemisë, humbja e kujtesës afatshkurtër është bërë simptoma më e zakonshme.
“Në literaturë sot përshkruhen një grup simptomash që lidhen me humbjen e kujtesës afatshkurtër dhe janë cilësuar si brain fog ose trullosje apo përhumbje. Nuk është shenjë e demencës. Nuk dihet nëse do të çojë në demencë pasi këto duan studime afatgjata por akuzohet edhe “COVID” sidomos “Long Covid” që është quajtur një ndër shkaqet e kësaj përhumbje të individëve. Nuk është shenjë e demencës”, tha neurologia Entela Basha.
Simptomat e përhumbjes së trurit përfshijnë harresën, përqendrimin e dobët dhe vështirësia në gjetjen e fjalëve ndër të tjera. Por a duhet të shqetësohemi nëse kjo përhumbje na ndodh shpesh?
“Për moshat mbi 60 vjeç e mira do të ishte të bëjnë një vlerësim tek specialist”, tha mjekja.
Mjekja këshillon edhe ushtrime të trurit
“Ka edhe ushtrime që mbajnë trurin ën formë. Psh pacientëve më “Alzhiemer” u sugjerohet të zgjidhin sa më shumë fjalëkryqe, të lexojnë libra, të mbajnë shënime e të ritregojnë. Shumë I rëndësishëm është edhe sporti e dieta”, tha neurologia.
Mjegullimi i mendjes është tepër frustuese dhe duhet adresuar kur ndodh shpesh.
