Në Mal të Zi është mbajtur një tjetër tubim për nder të 12 qytetarëve të mbetur viktima më 1 janar, mes tyre edhe dy fëmijë.
Masakra ndodhi në qytetin e Cetinjës, aty ku edhe të dielën në orën 17:26 filloi marshimi qytetar i shoqëruar nga një heshtje 12-minutësh, 1 minutë për secilin prej të ndjerëve. Pas 12 minutave, shokët e dy djemve të vrarë ndezën pishtarë të kuq.
Edhe Papa Françesku shprehu ngushëllimet për viktimat.
"Thellësisht i hidhëruar nga lajmi tragjik për vrasjet në qytetin e Cetinjës. Ati i Shenjtë u përcjell ngushëllimet e tij të sinqerta të gjithë atyre që janë prekur nga ky akt dhune i pamëshirë," thuhet në telegramin drejtuar argjipeshkvit të Kishës Katolike, imzot Rrok Gjonlleshajt, nga sekretari i Papa Françeskut, Pietro Paolini.
Autori i dyshuar Aco Martinoviç i kreu vrasjet brenda gjysmë ore në pesë vendndodhje të ndryshme, para se t'i jepte fund edhe jetës së tij. 45-vjeçari e hapi zjarrin e parë me armë në një restorant, ndërsa policisë iu deshën rreth gjashtë orë për ta lokalizuar.
Pjesëmarrësit kërkuan dorëheqjen e ministrit të Punëve të Brendshme, Danilo Saranoviq, dhe të zv.kryeministrit Aleksa Beçiq. Ndër kërkesat e tjera janë edhe çmilitarizimi i shoqërisë, konfiskimi i armëve, ndryshimi i qasjes së policisë ndaj qytetarëve dhe rikthimi i edukimit qytetar si lëndë e detyrueshme në shkolla.
Kryetari i bashkisë së Cetinjës ka kërkuar edhe mbledhjen e parlamentit vendor për të përcaktuar përgjegjësitë e mundshme dhe çfarë dështoi në sektorin e sigurisë.
Më 3 janar, Këshilli malazez i Sigurisë Kombëtare njoftoi shtrëngim të masave për posedimin e armëve.
Pas tubimit në Cetinjë, edhe në Podgoricë u zhvillua një tubim-protestë para godinës së Ministrisë së Brendshme, i kryesuar nga një grup studentor.
/rtsh.al/
