Kryeministri Benjamin Netanjahu i ka bërë thirrje popullit libanez që ta marrë seriozisht paralajmërimin e Izraelit se ata do të jenë në gjendje të kthehen në shtëpi pasi të kenë përfunduar luftimet.
“Lufta e Izraelit nuk është me ju. Është me Hezbollahun. Për një kohë të gjatë, Hezbollahu ju ka përdorur si mburoja njerëzore. Ka vendosur raketa në dhomat dhe garazhet tuaja. Ato raketa janë drejtuar në qytetet tona, drejtpërsëdrejti ndaj qytetarëve tanë. Për të mbrojtur popullin tonë kundër sulmeve të Hezbollahut, ne duhet t'i nxjerrim këto armë. Duke filluar nga mëngjesi i sotëm, IDF-ja ju ka paralajmëruar të dilni nga rruga e keqe”, ka deklaruar Netanjahu.
Ai ka bërë apel që ta marrin seriozisht paralajmërimin e Izraelit dhe të mos lejojnë Hezbollahun që t’u rrezikojë jetën.
“Ju bëj thirrje – merreni seriozisht këtë paralajmërim. Mos lejoni që Hezbollahu të rrezikojë jetën tuaj dhe jetën e të dashurve tuaj. Mos lejoni që Hezbollahu të rrezikojë Libanin. Ju largohuni nga rruga e keqe tani. Pasi të përfundojë operacioni ynë, ju mund të ktheheni të sigurt në shtëpitë tuaja”, është shprehur kryeministri izraelit.
Avionët izraelitë kanë filluar të intensifikojnë sulmet e tyre në Luginën Bekaa në Libanin verilindor, ndërsa ushtria izraelite ka lëshuar një paralajmërim, duke u thënë civilëve të lënë shtëpitë e tyre.
Lugina Bekaa konsiderohet një bastion i Hezbollahut dhe është goditur nga Izraeli në muajt e fundit, por sulmet këtë herë duken shumë më të rënda.
Nga ana e tyre, autoritetet libaneze kanë përditësuar numrin e të vdekurve nga sulmet e sotme ajrore izraelite, ku të paktën 274 njerëz janë vrarë, 21 prej të cilëve janë fëmijë.
Sipas ministrit të Shëndetësisë të Libanit, 1024 persona të tjerë janë plagosur në sulme.
/rtsh.al/
