Britania ka bërë të ditur se ka vendosur sanksione të reja që kanë si objejktiv industrinë e dronëve ushtarakë të Iranit në përgjigje të sulmit me dron dhe raketa të Iranit ndaj Izraelit në fillim të këtij muaji.
Masat të marra në koordinim me SHBA-në dhe Kanadanë, synojnë katër biznese dhe dy drejtorë në një rrjet kompanish dronësh, me qëllim që të kufizojnë aftësinë e Iranit për të lëshuar dronët.
“Sulmi i rrezikshëm i regjimit iranian ndaj Izraelit rrezikoi mijëra viktima civile dhe përshkallëzim më të gjerë në rajon.
Sot, Mbretëria e Bashkuar dhe partnerët tanë kanë dërguar një mesazh të qartë – ne do të kërkojmë përgjegjësi për sjelljen destabilizuese të Iranit”, tha në një deklaratë për mediat, Sekretari i Jashtëm britanik, David Cameron.
Britania ka njoftuar gjithashtu se do të vendosë ndalimin e eksportëve të komponentëve të dronëve dhe raketave në Iran, duke kërkuar të kufizojë aftësitë e saj ushtarake.
Javën e kaluar, Britania vendosi sanksione ndaj figurave dhe organizatave ushtarake iraniane, në një lëvizje tjetër të koordinuar me Shtetet e Bashkuara, pas veprimit të Iranit kundër Izraelit.
Irani lëshoi dronë dhe lëshoi raketa në Izrael më 13 prill si një sulm hakmarrës për sulmin në kompleksin e ambasadës së tij në Damask dy javë më parë, duke rritur rrezikun e përshkallëzimit të mëtejshëm të konfliktit në Lindjen e Mesme.
/rtsh.al/
