Kryeministri në detyrë Najib Mikati ka deklaruar në një konferencë në Paris të mbledhur në mes të ofensivës së Izraelit ndaj Hezbollahut, se mbështetja ndërkombëtare do të jetë e nevojshme për të mbështetur dhe zgjeruar ushtrinë e Libanit dhe për të rindërtuar infrastrukturën e shkatërruar të vendit.
Mikati tha se qeveria libaneze kishte vendosur të rekrutonte më shumë trupa dhe mund të dislokonte 8 mijë ushtarë si pjesë e një plani për të zbatuar një armëpushim dhe një rezolutë të Këshillit të Sigurimit të OKB-së të vitit 2006, e cila kërkon që ushtria të vendoset në Libanin jugor.
Ndërkaq, agjencia Kombëtare e Lajmeve e Libanit bën të ditur se një sulm izraelit ka goditur një makinë në autostradën që të çon në kryeqytetin e Bejrutit.
“Një dron armik shënjestroi një makinë në rrugën Kahale” tha NNA, duke iu referuar një zone malore në autostradën kryesore midis Bejrutit dhe Luginës lindore Bekaa.
/rtsh.al/
