Ministri i Ekonomisë, Kulturës dhe Inovacionit, Blendi Gonxhja, gjatë Ministerialit Ekonomik për Ballkanin Perëndimor në Berlin, ka zhvilluar një takim me Sekretarin e Shtetit për Ekonominë, Turizmin dhe Sportin të Sllovenisë, Matevž Frangež.
Ministri Gonxhja ka bërë publike fotot nga takimi, teksa shkruan në rrjetet sociale se u diskutua mbi forcimin e marrëdhënieve dypalëshe dhe bashkëpunimin në projekte me ndikim ekonomik, duke u fokusuar në përvojën sllovene në ekonominë malore dhe rurale.
Ministri Gonxhja theksoi rëndësinë e zhvillimit të strategjive të reja për tërheqjen e investimeve të huaja dhe gjenerimin e rritjes tregtare dhe rajonale. Ai vuri theksin te sipërmarrja inovative dhe promovimi i Shqipërisë si një destinacion i rëndësishëm turistik.
Në takim, palët ndanë prioritete të përbashkëta dhe perspektiva rajonale e integruese, duke njohur mbështetjen e vazhdueshme të Sllovenisë për vendet e Ballkanit Perëndimor në procesin e harmonizimit dhe anëtarësimit në Bashkimin Evropian.
/rtsh.al/
