Qeveria shqiptare ka miratuar një dispozitë kalimtare në ligjin për deklarimin e të ardhurave personale, duke shtyrë afatin e deklarimit të të ardhurave personale nga 30 prilli në 30 qershor 2021 . Por ka një kusht për këtë shtyerje , akti ligjor parashikon edhe faljen e gjobave për rastet kur plotësimi i deklaratës ka pasaktësi.
Megjithatë, akti specifikon se falja bëhet më kushtin e vetëm që dorëzimi i deklaratës vjetore të të ardhurave dhe pagesa e detyrimit të kryhet deri më 30 qershor 2021. Kjo shtyerje vjen pasi shumë qytetarë janë të painformuar pasi është hera e parë që bëhet kjo procedurë.
Në vendin tonë janë 88 mijë e 600 të punësuar, që gjatë vitit 2020 kanë pasur dy punë, të cilët do të duhet të deklarojnë të ardhurat e përfituara në vitin 2020, deri më 30 qershor 2021, pavarësisht nivelit të pagave që kanë pasur.
Pas deklarimit të të ardhurave që bëhet online në faqen e tatimeve të dhënat e detyrimit për t’u paguar dalin të paraplotësuara. Këto ndryshime parashikojnë që paga, ndonëse është marrë në dy apo më shumë vende pune, do të llogaritet si një e vetme dhe do të tatohet si e tillë.
Tatimi mbi të ardhurave për këtë kategori, përjashtohen vetëm njëherë deri në kufirin e 30 mijë lekëve dhe nëse të ardhurat e dy pagave i kalojnë 150 mijë lekë në muaj, do të tatohen për diferencën me 23%, duke zbritur tatimin e paguar gjatë vitit. Shuma minimale që duhet të paguajë një i dypunësuar që ka punuar 12 muaj në dy punë dhe është paguar me pagë minimale prej 26 mijë lekësh është 2,860 lekë në muaj, ose 34320 lekë në vit.
Ekonomi
Dypunësimi, shtyhet deri më 30 qershor afati për deklarimin e të ardhurave
06/05/2021