Në një kohë kur kryeministri izraelit Benjamin Netanjahu thotë se Presidenti i SHBA-ve, Joe Biden ka rënë dakord të dërgojë një delegacion izraelit në negociata, një zëdhënës i Hamasit citohet të ketë thënë se “ne nuk i besojmë Netanjahut apo administratës amerikane. Ne i besojmë rezistencës, popullit tonë dhe fronteve mbështetëse”, referuar grupeve të tjera terroriste të mbështetura nga Irani, përfshirë Hezbollahun në Liban.
“Duke monitoruar deklaratat e Netanjahut, ne mund të vërejmë kontradiktën dhe kjo konfirmon se Netanjahu nuk është serioz për arritjen e një marrëveshjeje”, tha zëdhënësi i Hamasit në Liban, Ahmed Abdel Hadi për stacionin satelitor të lajmeve al Mayadeen libanez pro-Hezbollahut, duke shtuar se “Netanjahu nuk do armëpushim.”
Ai thotë se Hamasi “po sillet objektivisht” dhe zotohet të “vazhdojë rezistencën nëse nuk arrihet një marrëveshje.
Zëdhënësi i Hamasit thotë se grupi terrorist nuk “dha përgjigje” ndaj propozimit të fundit të marrëveshjes së armëpushimit të pengjeve, por “tregoi fleksibilitet”.
“Ne po kërkonim të formulonim fraza fikse dhe fleksibiliteti sot është në formë, jo në përmbajtje. Na u tha nga ndërmjetësit se atmosfera është pozitive dhe se një marrëveshje mund të arrihet,” shton ai.
Negociatat e nisur prej gjashtë muajsh me anë të ndërmjetësve, përfshirë SHBA-në, Katarin dhe Egjiptin, kanë dështuar herë pas here për të arritur një marrëveshje që do të çonte në lirimin e 116 pengjeve të rrëmbyer më 7 tetor të vitit të kaluar, si dhe në shkëmbimin dhe lirimin e qindra të burgosurve palestinezë, për të shkuar edhe drejt një armëpushimi të plotë.
/rtsh.al/
