Në orët e para të mëngjesit është dëgjuar një shpërthim i fuqishëm në pjesën veriore të Kosovës, ku dyshohet se është hedhur një granatë dore. Agjencia e lajmeve KosovaPress raporton se incidenti ka ndodhur rreth orës 02:00 pas mesnate, në oborrin e banesës së biznesmenit serb, Dragan Mllagjeviç, i njohur me nofkën Soni.
Në komunikatën e Policisë së Kosovës në veri thuhet “Sot në orët e para të mëngjesit në Zveçan, respektivisht Zherovnic është dëgjuar një shpërthim, që dyshohet se është shkaktur nga një granatë dore e cila është hedhur në oborrin e një shtëpie. Janë shkaktuar dëme të vogla materiale, ndërsa nuk ka njerëz të lënduar.”
KosovaPress duke cituar burimet e saj raporton se dyshohet se biznesmeni serb Mllagjeviç është sulmuar qëllimshëm për shkak të bashkëpunimit të ngushtë me shqiptarët, ndërsa së fundmi kishte furnizuar me mallra edhe veriun.
Gazetare: V. Zhari
/RTSH/