TikTok doli jashtë linje në Shtetet e Bashkuara të shtunën mbrëma, më pak se dy orë përpara se ndalimi të hynte në fuqi. Ndërprerja parandalon aksesin në një nga aplikacionet më të njohura të mediave sociale në botë i cili përdorej nga 170 milionë amerikanë.
Veprimi i TikTok vjen pasi Gjykata e Lartë mbështeti një ndalim që u miratua me mbështetje të gjerë dypartiake në Kongres dhe u nënshkrua në ligj në prill nga Presidenti Joe Biden. Ligji i ndalon kompanitë amerikane të presin ose të shërbejnë përmbajtje për platformën e mediave sociale në pronësi kineze.
Por TikTok mund të mos jetë zhdukur për shumë kohë. Kompania sugjeroi se mund të rikthehej së shpejti.
"Ne jemi me fat që Presidenti Trump ka treguar se ai do të punojë me ne për një zgjidhje për të rivendosur TikTok sapo të marrë detyrën," postoi kompania në mesazhin e saj për përdoruesit që hapën aplikacionin duke filluar nga mbrëmja e së shtunës vonë. "Ju lutemi qëndroni të sintonizuar!"
Presidenti i sapo zgjedhur Trump tha se "ka shumë të ngjarë" do të vonojë një ndalim të TikTok për 90 ditë pasi ai të marrë detyrën të hënën.
“Unë mendoj se ky do të ishte, sigurisht, një opsion që ne e shikojmë. Zgjatja prej 90 ditësh është diçka që me shumë mundësi do të bëhet, sepse është e përshtatshme. Duhet ta shikojmë me kujdes. Është një situatë shumë e madhe”, tha Trump.
Aplikacioni është zhdukur gjithashtu nga App Store i Apple dhe dyqani Google Play dhe aplikacione të tjera në pronësi të kompanisë mëmë të TikTok, ByteDance përfshirë CapCut.
Shefi ekzekutiv i TikTok, Shou Chew është takuar me Trump në javët para hyrjes në fuqi të ndalimit dhe pritet të marrë pjesë në inaugurimin e Trump të hënën.
/rtsh.al/
