Pandemia e Virusit korona prej më shumë se një viti e ka paralizuar sektorin e turizmit në vend. Veçantërisht më të dëmtuarit në këtë sektor janë tur-operatorët dhe resortet në bregdet, të cilat dita ditës po ndiejnë vështirësi në egzistencën e tyre.
Sot në qytetin e Durrësit gjen dhjetra investime serioze me standartet më moderne të kohës. Drejtuesit dhe menaxherët e këtyre sipërmarrjeve thonë se shteti duhet të ketë një vëmendje më të madhe për ta sidomos të rishikojë mundësinë e lehtësimit të orareve të mbylljes kundër virusit korona.
Fatos Çerenishti një sipërmarrës i vjetër në fushën e turizmit tregon se investimet e mëdha të kryera gjatë viteve të fundit dhe përballja me detyrimet financiare që ata kanë me bankat, i kanë vënë përballë një sfide të vështirë.
Zoti Çerenishti thotë më tej se standartet që kanë sot resortet në qytetin e Durrësit dhe jo vetëm, i plotësojnë të gjitha kushtet nga pikpamja e hapsirës që të mos jenë vatra të përhapjes së virusit korona. Ai kërkon prej autoriteteve shtetërore vaksinim të stafit që punon në sektorin e turizmit që sipas tij do të sillte një zhvillim normal të këtij aktiviteti edhe në kushte pandemie.
Baret dhe restorantet janë ndër bizneset më të prekur nga masat e reja kufizuese për shkak të uljes së fashës së orarit nga ora 22:00 në orën 20:00. Operatorët turistik shprehen se vetem gjatë javës së parë të vendosjes së fashës se re orare puna është reduktuar me 60%.
