Kreu i Partisë së Lirisë Ilir Meta ka uruar Erisa Xhixhon për zgjedhjen dje në Konventën Kombëtare si zëvendës presidente e PL.
Duke i dedikuar një reagim të gjatë , Meta shkruan në rrjetin social Facebook, se, “me statutin si Zëvendës Presidente do të ketë kompetenca shumë të rëndësishme në drejtimin e Partisë të Lirisë. Kemi vendosur të jemi Partia më demokratike, më e hapur dhe më transparente, siç e panë të gjithë shqiptarët dje. Por jemi të vendosur të jemi Partia më e organizuar dhe më ekzekutive në zbatimin e vendimeve që marrim. Prandaj Erisa do të jetë jo vetëm Zëvendës Presidente por edhe ZëvendësKomandante në zbatimin e vendimeve të Partisë të Lirisë”.
Duke vlerësuar aftësinë drejtuese të Erisa Xhixhos, Meta thotë se , lidershipi i saj është testuar në momente shumë të vështira dhe ajo di të marrë përgjegjësi dhe të jetë jo vetëm e dashur dhe e buzëqeshur me të gjithë por edhe plot autoritet kur duhet.
“Unë besoj shumë se me lidershipin e saj shumë shpejt do të frymëzojë shumë gra, të rinj dhe të reja t'i bashkohen Partisë të Lirisë”, shkruan ndër të tjera Meta.
/rtsh.al/
