RTSH 24 Live

Serbi

Presidenti kinez Xi Jinping mbërriti në Beograd dhe u prit nga presidenti serb Aleksandër Vuçiç në aeroport

08/05/2024

Presidenti kinez Xi Jinping mbërriti në Beograd dhe u prit nga presidenti serb Aleksandër Vuçiç në aeroport

Presidenti kinez i shoqëruar nga bashkëshortja e tij, është pritur nga Presidenti Aleksandër Vuçiq dhe bashkëshortja e presidentit Vuçiq, Tamara Vuçiq, kryeministri i Serbisë Millosh Vuçeviq, kryetarja e Kuvendit Kombëtar Ana Brnabiq, ministri i Jashtëm Marko Gjuriq, si dhe ish-presidenti i Serbisë Tomislav. Nikoliq dhe gruaja e tij Dragica.

Presidenti kinez Xi Jinping mbërriti në Serbi i shoqëruar nga avionët MIG-29 në një vizitë me masa të larta sigurie, që përkon me 25-vjetorin e bombardimit nga NATO të ambasadës kineze në Beograd, ku u vranë tre gazetarë kinezë.

Serbia, pas Francës, është ndalesa e dytë në vizitën e parë të Presidentit Xi në Evropë në pesë vjet, ku përfshihet edhe një vizitë në Hungari. Në Serbi, e cila shihet si partneri më i rëndësishëm i Kinës në Ballkan, Presidenti Xi pritet të diskutojë investimet e Kinës në vend dhe marrëveshje të reja të mundshme.

Presidenti serb Aleksandar Vuçiç dhe zyrtarë të qeverisë e pritën Presidentin kinez Xi në aeroportin e Beogradit, ku u prit nga një roje ushtarake e nderit dhe grup kërcimtarësh folklorikë. Të dy udhëheqësit do të zhvillojnë një takim dypalëshë të mërkurën.

 Më 7 maj 1999, 20 shtetas kinezë u plagosën në sulmin e NATO-s, i cili shkaktoi zemërim në Kinë dhe një kërkim falje nga presidenti i atëhershëm amerikan Bill Clinton.

Ambasada u godit gjatë një fushate ajrore kundër Jugosllavisë së atëhershme për të detyruar presidentin serb Slobodan Millosheviç që t’i jepte fund shtypjes së shqiptarëve në Kosovë.

“Populli kinez e vlerëson paqen, por kurrë nuk do të lejojë përsëritjen e tragjedive të tilla”, tha Presidenti Xi në një artikull të opinionit në të përditshmen “Politika” të martën.

Rrugët e Beogradit u zbukuruan me flamuj kinezë dhe pankarta ndërsa mijëra oficerë policie u angazhuan për t’u kujdesur për sigurinë e Presidentit Xi dhe delegacionin e tij 400 anëtarësh, vizita e nivelit më të lartë nga një udhëheqës i huaj në vite

/rtsh.al/