Zona e Lirë Ekonomike në Tiranë ka tërhequr vëmendjen e kompanive të huaja në Panarin e Teknologjisë, që po zhvillohet në Hanovër të Gjermanisë. Kështu deklaroi kreu i Bashkisë së Tiranës, gjatë vizitës së instalacionit prezantues të Bashkisë së Tiranës në këtë panair. Veliaj, tha se kompanitë gjermane do të njihen me hapësirat që ofron shteti shqiptar, si për taksat ashtu edhe për lehtësirat e të bërit biznes.
“Ka një interes të jashtëzakonshëm për zonën e lirë ekonomike, për të cilën Tirana ka licencën dhe ka filluar punën. Mezi presim që 5-7 mijë vende të reja pune, që do të hapen, të jenë të lidhura edhe me Gjermaninë dhe pagat e mirëpaguara të kompanive gjermane. Kemi filluar një fushatë agresive marketingu në të gjitha panairet e mundshme, për të thënë që në Tiranë ka diell, ka dëshirë për punë dhe hapësira e lehtësira të nevojshme nga qeveria dhe nga bashkia, si për taksa, si edhe për të bërë biznes. Mezi presim që të vazhdojmë punën e mirë të nisur me Lufthansa Industry Solutions dhe me disa kompani të tjera, që e kanë kthyer Tiranën në epiqendrën e kodimit, të punëve të mirëpaguara dhe të punëve që janë e ardhmja e punësimit”, u shpreh Veliaj.
Ai tha se pas panairit të Teknologjisë do të synohet ai i Turizmit, që do të mbahet në Berlin.
“Mezi pres që në këto 3 ditë që do të jemi në panair, të vazhdojmë bashkëpunimin me panairin e Berlinit për turizmin, duke qenë se Tirana, përveç bregdetit, është kthyer gjithashtu në një destinacion për turizmin. Ta kthejmë këtë raport special të Shqipërisë me Gjermaninë, nga një raport inferior, ku kryesisht në vitet ’90-të kemi qenë duke kërkuar ndihma dhe asistencë për mbijetesë, sot kemi një partneritet ku punojmë, shkëmbejmë dhe ku sigurisht, fitojnë të dyja palët, edhe pala gjermane, edhe stafi ynë super i kualifikuar, që sot ka rroga shumë më të mira”, tha kryebashkiaku.
/rtsh.al/
