Hamasi po shqyrton armëpushimin e propozuar përmes ndërmjetësimit në të cilin po merr pjesë edhe Egjipti, i tha kreu i lëvizjes palestineze Ismail Haniya në një bisedë telefonike kreut të shërbimeve të inteligjencës egjiptiane.
Haniya i tha Abbas Kamel se negociatorët e Hamasit do të kthehen "sa më shpejt të jetë e mundur" në Egjipt për të përfunduar negociatat në vazhdim për një armëpushim në luftën e Gazës.
Lideri i Hamasit pati një bisedë të ngjashme telefonike me kryeministrin dhe ministrin e Jashtëm të Katarit, Mohammed bin Abdulrahman Al-Thani, sipas një deklarate nga lëvizja palestineze.
Propozimi bën thirrje për një armëpushim në operacionet ushtarake izraelite, të cilat do të shoqërohen me shkëmbimin e pengjeve të rrëmbyer gjatë sulmit të lëvizjes palestineze më 7 tetor në territorin izraelit për palestinezët e burgosur në Izrael.
Qeveria izraelite akuzoi sot Hamasin se po pengon një marrëveshje duke refuzuar të bëjë lëshime. “E vetmja gjë që pengon një marrëveshje është Hamasi. Gjithçka që po bën Hamasi është të forcojë kushtet e tij dhe të forcohet pas kërkesave absurde”, shpjegoi Rachel Karamson, një zëdhënëse e qeverisë izraelite, gjatë një konference për shtyp sot.
Hamasi, i cili mori pushtetin në Rripin e Gazës në vitin 2007, dëshiron që marrëveshja të sigurojë një armëpushim "të përhershëm". Izraeli refuzon, duke thënë se dëshiron të vazhdojë ofensivën deri në "fitoren përfundimtare" mbi lëvizjen islamike, të cilën e konsideron një organizatë terroriste si Shtetet e Bashkuara dhe Bashkimi Evropian.
Të martën, kryeministri izraelit Benjamin Netanyahu tha se ushtria izraelite do të hyjë në Rafah pavarësisht nëse do të arrihet apo jo një marrëveshje armëpushimi me Hamasin.
/rtsh.al/
