Hamasi ka bërë të ditur sot se po shqyrton propozimin e Izraelit për një armëpushim në Gazë, ndërsa Egjipti intensifikoi përpjekjet për të ndërmjetësuar një marrëveshje për t'i dhënë fund luftës disamujore dhe për të shmangur ofensivën tokësore të planifikuar izraelite në qytetin e Rafahut.
Zyrtari i lartë i Hamasit, Khalil al-Hayya nuk dha detaje për ofertën e Izraelit, por tha se ishte në përgjigje të një propozimi nga Hamasi dy javë më parë.
Negociatat në fillim të këtij muaji u përqendruan në një propozim gjashtë-javor për armëpushim dhe lirimin e 40 pengjeve civilë dhe të sëmurë në këmbim të lirimit të qindra të burgosurve palestinezë në burgjet izraelite.
Deklaratat e Hamasit vijnë disa orë pasi delegacioni egjiptian i nivelit të lartë përfundoi një vizitë në Izrael, ku diskutoi një "vizion të ri" për një armëpushim të zgjatur në Gazë, sipas një zyrtari egjiptian, i cili foli në kushte anonimiteti.
Nuk ishte menjëherë e qartë nëse propozimi i ri i Izraelit lidhej drejtpërdrejt me vizitën e së premtes nga ndërmjetësit egjiptianë.
Diskutimet midis zyrtarëve egjiptianë dhe izraelitë u fokusuan në fazën e parë të një plani “shumëfazor që do të përfshinte një shkëmbim të kufizuar pengjesh të mbajtura nga Hamasi për të burgosurit palestinezë dhe kthimin e një numri të konsiderueshëm të palestinezëve të zhvendosur në shtëpitë e tyre në Gazën veriore. me kufizime minimale”, tha zyrtari egjiptian.
Sipas egjiptianëve, ndërmjetësuesit po punojnë për një kompromis që do t'i përgjigjet shumicës së kërkesave kryesore të të dyja palëve, të cilat mund të hapin rrugën për vazhdimin e negociatave me qëllimin e një marrëveshjeje më të madhe për t'i dhënë fund luftës.
/rtsh.al/
