Festivali Ndërkombëtar i Akuarelit 2024 po zhvillohet këto ditë në Lushnjë. Artistë të shumtë, nga vendi dhe bota, pjesëmarrës në këtë festival, do të ekspozojnë pikturat nga peizazhet më të bukura, një pjesë e të cilave do të krijohen gjatë ditëve të këtij eventi.
Në çelje të tij kryetarja e bashkisë Eriselda Sefa u shpreh se ky festival do te shërbejë për nxitjen e jetës artistike e kulturore në këtë qytet, si edhe njohjen me potencialin turistik të trevës myzeqare.
"Duke qenë djepi i artit dhe kulturës, duhet që të zhvillojmë sa më shumë aktivitete në mënyrë që qytetarët e Lushnjës të mbetën të kënaqur dhe ta shijojnë këtë art pafund", tha Sefa.
Piktori Helidon Haliti, ka ekspozuar në sallën e muzeut historik të qytetit, 10 nga veprat e tij. Ai thekson se të huajt janë mrekulluar nga peizazhet e natyrës në Lushnjë e Divjakë.
“Lushnjarët mundohen gjithmonë të tregojnë apo të shfaqin mirësinë e tyre në të gjithë botën”, tha piktori.
Festivali Ndërkombëtar i Akuarelit do të zgjasë deri në datën 15 maj. Qëllimi i tij është jo vetëm të prezantojë talentet botërorë, por edhe të promovojë zonat turistike shqiptare dhe bukuritë e natyrës.
/rtsh/
