Varret në Përmet i përkasin mesjetës

Prej ditës së enjte kanë nisur gërmimet arkeologjike për disa varre të zbuluara në qytetin e Përmetit, gjatë punimeve për infrastrukturën rrugore. Grupet e ngritura nga Instituti Kombëtar i Trashëgimisë Kulturore dhe Sektori i Monumenteve të Kulturës në Përmet, kanë konstatuar deri tani 12 varre.
Arkeologu Mariglen Meshini, gjatë një interviste të dhënë për RTSH, është shprehur se varret e gjetura i përkasin periudhës së mesjetës, bazuar në strukturën dhe vendosjen e tyre në drejtimin Lindje-Perëndim, duke hedhur poshtë konstatimet se këto kanë qenë varre masive gjatë periudhës së komunizmit. 
Meshini pohon gjithashtu se gjatë gërmimeve në vazhdim, mund të konstatohen një numër më i madh varresh mesjetare. 
Zbulimi i varreve masive ngjalli fillimisht reagime të shumta. Shoqata antikomuniste e të përndjekurve politikë, shprehu dyshimin se ato ju përkisnin të zhdukurve nga diktatura komuniste. Sipas saj në atë zonë dikur ka qenë një ish-repart i Ministrisë së Brendshme.