30 persona që i përkasin 10 familjeve nga fshatrat Kuç, Bërdicë dhe lagjes Ajasëm të qytetit të Shkodrës, banesat e të cilëve janë përmbytur janë të strehuar aktualisht në konviktin e Universitetit “Luigj Gurakuqi” të Shkodrës, njofton RTSH nga Shkodra .
Banorët thonë se janë detyruar të lenë shtëpitë e tyre pas vërshimit të ujit dhe e kanë akoma të pamundur të kthehen për shkak të pranisë së tij, por edhe dëmeve që u janë shkaktuar nga përmbytjet.
Drejtori i konviktit Arban Lutfija thotë se që fillimi i emergjencës pranë këtij konvikti kanë kërkuar ndihmë rreth 26 familje, 16 prej të cilave kanë marrë shërbim .
Ndërkohë banorëve që janë prekur nga përmbytjet po i ofron ndihma edhe Kryqi i Kuq Shqiptar. Bëhet fjalë për ndihma në veshmbathje, detergjente dhe me nevoja të tjera emergjente për banorët.
Me përmirësimin e situatës pritet që banorët që janë akomoduar në konviktin e Universitetit të Shkodrës mund të rikthehen në banesat e tyre të cilat u prekën nga përmbytjet e ditëve të fundit.
/ rtsh.al /