Universiteti i Mjekësisë në Tiranë mbushi 70 vjet nga krijimi.
Pjesë e veçantë e historisë shkencore dhe intelektuale të vendit, universiteti e nisi rrugëtimin e tij menjëherë pas Luftës së Dytë Botërore, si Instituti i Lartë Mjekësor me 67 studentë.
Ndër dekada ai formoi breza të tërë profesionistësh në fushën e mjeksisë që kontribuan dhe kontribuojnë jo vetëm në Shqipëri.
Kryeministri Edi Rama i pranishëm në ceremoni i dorëzoi rektorit të Universitetit Arben Gjata “Yllin e Mirënjohjes Publike”, në nderim të punës 70 vjeçare të këtij institucioni të arsimit të lartë në vend.
Ministrja e Arsimit Evis Kushi, gjatë fjalës së saj u ndal tek një prej sfidave kryesore për universitetin, përballimin e largimit të mjekëve dhe infermierëve nga Shqipëria drejt vendeve të BE-së.
Universiteti i Mjeksisë është një ndër institucionet e arsimit të lartë që ka përthithur me shumë fonde nga BE-ja me anë të projekteve.
Janë rreth 300 studentë dhe profesorë të këtij Universiteti që kanë përfituar nga programet e Bashkimit Europian për Shqipërinë.
/ rtsh.al /
