Kuvendi ka mbajtur një minutë heshtje në nder të viktimave që humbën jetën në Bogë si pasojë e reshjeve të shiut. Kërkesa është bërë fillimisht nga deputeti demokrat Ramadan Lika, i cili kërkoi nga deputetët të mbajnë një minutë heshtje për dy viktimat, babë e bir që humbën jetën para 4 ditësh në Malësinë e Madhe.
Më 20 nëntor në vendin e quajtur “Grykë Lugje”, në njësinë administrative Shkrel, Malësi e Madhe, rrjedha e ujit të përroit mori përpara një automjet me të cilin udhëtonin tre persona, babai, djali dhe vajza. Kjo e fundit arriti të dilte nga automjeti, ndërsa babai me djalin u morën nga rrjedha e ujit. Polumbarët e RENEA, grupi i evakuim-shpëtimit, grupi alpin i FNSH Shkodër, emergjencat civile dhe shërbimet e Komisariatit të Policisë Malësi e Madhe, pas 16 orësh kërkim kanë bërë të mundur gjetjen e dy trupave të pajetë.
/rtsh.al/
